Máis do mesmo

[Alberto]

A min paréceme que a esta Galicia que vai para atrás educativamente falando, e socialmente como consecuencia delo, ninguén lle está a poñer atrancos para dificultar o seu progreso. Máis ben é a sociedade galega mesma, coa súa clase política levando o temón, quen non dá mostras de querer progresar. E non se me ocorre ningunha outra razón para que esta comunidade non aposte pola incorporación das TIC ao ensino como están a facer practicamente todas as demais dentro do estado español.

Seguirei a ser coordinador TIC cos mesmos 90 minutos semanais do curso pasado. Con isto xa o digo todo: máis do mesmo e nada que facer… Continuarei coa miña autoformación e terei como obxectivo manter a web dinámica, que de dinámica non ten nada porque o único que a manexa son eu mesmo.

Nas miñas clases, ao non ter os ordenadores que necesito, tampouco poderei incorporar as TIC dun xeito serio e efectivo, aínda que seguirei a investigar e aprender para unha posible oportunidade no futuro.

Este curso vén de comezar e xa está perdido…

[Alberto]

Pois seguen a ser os mesmos 90 minutos, pero agora teremos dúas sesións semanais para dedicalas á dinamización TIC, na que se anotaron 17 profesoras e profesores.
Isto xa dá para algo, malia que non sexa dabondo para o longo camiño a percorrer...
Abrín unha Ning para o profesorado do meu centro. Se conseguimos reunirnos unha hora á semana ou cada dúas semanas, procurarei explicar o funcionamento da rede, animar a facer blogues, impulsar o coñecemento e a utilización das aulas de informática, do encerado dixital, dos portátiles e proxectores, da web dinámica....
Dispoñendo de tempo, vontade non falta. A ver ata onde chegamos...

[Alberto]

Pois si, ensino-ficción, e de cara á galería funciona a propaganda. O último que lin de parte da Consellería é que non se precisan máis ordenadores nos centros galegos. ¡Madia leva!
E cando falo coa xente, fóra do noso ámbito profesional, pois teñen esa idea: nos colexios galegos hai ordenadores a moreas... Bueno, dentro do noso ámbito tamén se comparte esa "visión" por parte de quen non os queren ver nin de lonxe, que son a maioría...
En fin, quen temos ideas para traballar debemos admitir que non vai ser doado conseguir os medios que necesitamos. Supoño que bastantes xa se queimaron e non poucas/os estamos medio chamuscadas/os.
Finalmente, veño de entregar unha proposta ao director do meu centro:

PAC 2008-2009

OBXECTIVOS ESPECÍFICOS

Incorporar as TIC á docencia en todas as áreas e niveis.

MEDIDAS A DESENVOLVER

Establecer unha reducción de horario lectivo para o coordinador TIC de entre seis e dez horas semanais (de acordo co que se fai na maioría das comunidades autónomas) para que poida asesorar ao profesorado durante o horario escolar na incorporación das TIC ás súas actividades docentes. Este asesoramento icluiría, dentro do tempo que se dispoña, a instrucción e apoio na confección de blogues educativos, o manexo básico de ordenadores e proxectores, do encerado dixital interactivo, e a utilización da web dinámica.
Establecer un grupo de dinamización TIC con profesorado de todas as etapas.
Conseguir que en todas as aulas se dispoña dun ordenador e un proxector de forma permanente. Solicitar á Consellería un ordenador para cada 2 alumnas/os e cobertura wifi en todas as aulas do centro.

Por intentalo que non quede. Xa vos contarei...

[Revolta da freixa]

¿Noventa minutos? Coma no chiste de Castelao: ¿Tiñas unha vaquiña e dicías que eras pobre?
Se cadra, como xa estou queimado, digo barbaridades. Pero creo que o mundo do ensino parece cada vez máis ciencia ficción.

[dplingua]

Máis do mesmo, si.
Non o perdamos, logo, cando menos no intento de facer comunidade de práctica na rede desde esa nosa realidade.
Podemos aprofundar nas iniciativas abertas... e explorar outras.