Plan TIC

[Xosé Vidal]

Na nosa escola (CEIP de 15 unidades) só temos ordenadores na sala de informática (case 20), e 2 na sala de profesores. Comézase a propoñer ter un ordenador por aula. A utilización por parte do profesorado poderíase dicir que é baixa.

Solicitamos a web dinámica xa en decembro á uac. pero despois de tres intentos seguimos sen resposta.

Estamos elaborando un plan TIC neste curso. As cousas van de vagar. O primeiro aínda estamos pasando unhas enquisas para facer un diagnóstico inicial. De anticipo, moitos alumnos/as teñen ordenador na casa, pero moi poucos conexión a internet. Para o profesorado tamén son cousas novas.

Cada centro ten a súa propia realidade e haberá que contextualizar moito.

Imparto varias clases de informática (3 grupos de terceiro ciclo e algún obradoiro máis).

O que me dá resultado é:
Aprender mecanografía: a partir de 3º de primaria de xeito sistemático, e incluso comezar en 2º con exercicios
máis lúdicos. Funciona ata 6º curso. Uns 20 minutos por sesión. O mellor que coñezo é: http://www.cursomeca.com/

Actividades de reforzo por áreas en http://www.edu.xunta.es/contidos/portal/primaria.htm
e tamén en http://clic.xtec.es/db/listact_es.jsp?lang=es&ordre=0&desc=...*&idioma=gl&nivell=PRI&text_titol=&text_aut=&text_desc=&num=25 (Aquí hai moitas máis cousas para infantil e 1º ciclo)

Contas de correo en gmail (por exemplo): para o alumnado de 3º ciclo. Moi atractivo ao principio (4 ou 5 sesións... logo hai que darlle contido)

Participar publicando noticias no blog do colexio (en obradoiro, con moita liberdade temática). http://ceipmontemogos.blogia.com/

Intentos fallidos en google.docs (prometía pero corre mal), e wikis. Tamén en gravacións de audio e vídeos co alumnado. Hai que crear antes o ambiente propicio.

Seguiremos investigando :-)

[Xosé Vidal]

Unha cousa máis. Entendo que aos profesores haberá que convencelos cos feitos e non só cos discursos. Penso que eles deben verlle unha utilidade inmediata aos recursos TIC, e senón seguirán firmes nas súas rutinas.

A modo de exemplo, paréceme que sería boa idea elaborar unidades didácticas nun wiki, con tódalas actividades (tamén multimedia) secuenciadas para traballar na aula. Os profes terían o equivalente a un libro tradicional e poderían organizar alí o seu traballo.

[Alberto]

Mentres no resto do estado teñen lámpadas, aquí usamos candeas. Unha correntiña de aire e xa estamos ás escuras. Bueno, eu intento por todos os medios que o profesorado do meu centro utilice as TIC. A través do blog de coordinador, do wiki do centro, da web dinámica, do blog das miñas clases, publicando manuais para clasificar recursos no wiki, facéndollo eu mesmo a dous ou tres para que continúen, ensinándolles a usar o encerado dixital, o Xade, o correo electrónico... E nada de nada. No wiki publicamos practicamente só Román e mais eu, na web dinámica de momento só eu e outro profesor que subiu unha programación, o meu blog de coordinador case non o mira ninguén, os recursos clasificados dúas profesoras de 3º Ciclo porque xa os teñen feitos. E cando lles envío un correo ós 45 membros do claustro, e o fago a miúdo, ábreno seis ou sete. Así que non é que estea farto, teño moita constancia e dedicación, pero estou xa convencido de que cada profesor/a debe percorrer un camiño necesario para aprender as TIC e as súas posibilidades didácticas. Nos atrancos sempre contan comigo e con algúns/algunhas outr@s para axudarlles. Pero o camiño só o emprenden catro ou cinco, sendo xeneroso na estimación, e son persoal novo e de paso no centro a maioría. Eu non albisco o futuro, porque se agardan a que a administración aposte aquí polas TIC e lles dean as cousas feitas estarán agardando moito tempo... Oxalá estea eu moi trabucado.

[Xosé Vidal]

Ola Alberto:
Xa vexo que traballas sen descanso.
Despois de ver os wikis, eu, que son un profe perguiceiro, botei de menos non atopar unha unidade didáctica da materia x todo explicado pasiño a pasiño... ao mellor así interesaríame, pero cando vexo tantos recursos xuntos desmoralízome se teño que andar buscando cal me pode gustar ou non.
Por outra parte, a miña experiencia non é moi diferente á túa. A min cos e-mail sucédeme o mesmo... (agora envío un cada 3 ou 4 meses) aínda que algún que outro profesor vai picando de vez en cando.
Eu acabei tomándome as cousas con moita calma... presionando continuamente, pero suave, suave.
Os profesores que eu imaxino están cómodos nas súas rutinas e se non utilizan as TIC e porque non lle viron utilidade e o ven como algo moi complicado. Todo chegará ao seu tempo, pero hai que ir deixando que as froitas maduren ao seu ritmo... aínda que lles teña que caer algún día un bo chaparrón ou outro día teñan que sufrir o calor abrasante do sol.
Pero pouco a pouco todo se andará e seguro que dentro de dez anos non haberá profesor que non utilice asiduamente o ordenador. E entón mellorará o ensino para mellor? Tampouco o vexo tan claro. Os profesores deben ir incorporando esta tecnoloxía na súa docencia, pero facéndolle sitio ao lado do que xa coñecen, co obxecto de que poidan mellorala. Isto non está sempre garantizado polo feito de usar as TIC.
Bueno, creo que acabei mesturando cousas. Voume instalar a ubuntu noutro ordenador e a ver se me furrula a pizarra dixital. Chao.